آگرہ میں ہولناک واردات: بیوی نے شوہر کو مار کر باتھ روم کے فرش کے نیچے دفنایا، 45 دنوں تک روتی رہی اور رچاتی رہی گمشدگی کا ڈرامہ!

آگرہ: اتر پردیش کے شہر آگرہ کے سکندرہ علاقے سے ایک ایسا دل دہلا دینے والا معاملہ سامنے آیا ہے جس نے سب کو ہلا کر رکھ دیا ہے۔ ایک سنگدل بیوی نے اپنے ہی شوہر کو بے دردی سے موت کے گھاٹ اتارنے کے بعد لاش کو باتھ روم کے فرش کے نیچے گڑھا کھود کر دفن کر دیا اور 45 دنوں تک پولیس، رشتہ داروں اور پڑوسیوں کے سامنے شوہر کی گمشدگی کا ڈرامہ رچاتی رہی۔ پولیس کی اچانک تفتیش نے اس لرزہ خیز قتل کا پردہ فاش کر دیا۔
کھیر میں نشہ آور گولیاں ملا کر کیا قتل:
پولیس کے مطابق، 44 سالہ مقتول ‘سریندر شرما’ اپنی بیوی ‘روبی شرما’ اور دو بیٹیوں کے ساتھ دہاتورا علاقے میں رہتا تھا۔ ان کی شادی کو تقریباً 16 سال ہو چکے تھے۔ واردات والے دن ملزمہ روبی نے ایک سوچی سمجھی سازش کے تحت اپنی دونوں بیٹیوں کو اپنے جیٹھ (شوہر کے بڑے بھائی) کے گھر بھیج دیا۔ اس کے بعد اس نے اپنے شوہر سریندر کو کھیر میں نیند کی گولیاں ملا کر کھلا دیں۔ جیسے ہی سریندر بے ہوش ہوا، روبی نے اس کا گلا گھونٹ کر اسے موت کی نیند سلا دیا۔
باتھ روم میں کھودا گڑھا، اوپر سے پکا کر دیا فرش:
قتل کرنے کے اگلے ہی دن، ملزمہ نے گھر کے باتھ روم میں ایک گہرا گڑھا کھودا اور شوہر کی لاش کو اس میں دبا دیا۔ جرم کو چھپانے کے لیے اس نے گڑھے کے اوپر سیمنٹ کا پکا فرش بنوا دیا تاکہ کسی کو شک بھی نہ ہو۔ پچھلے 45 دنوں سے جب بھی کوئی رشتہ دار یا پڑوسی سریندر کے بارے میں پوچھتا، تو روبی جھوٹا دکھاوا کرتی اور روتے ہوئے کہتی کہ وہ کہیں چلے گئے ہیں۔ یہاں تک کہ اس نے 26 مئی کو پولیس اسٹیشن میں شوہر کی گمشدگی کی رپورٹ بھی درج کروا دی تھی۔
پولیس کی ہوشیاری سے کھلا راز:
اس ہولناک جرم کا انکشاف اس وقت ہوا جب پولیس کی ایک ٹیم سریندر کے ایک پرانے کیس کی معمول کی تصدیق (Routine Verification) کے لیے اس کے گھر پہنچی۔ پولیس کو دیکھ کر روبی بری طرح گھبرا گئی اور فوراً اپنے جیٹھ کو فون کر کے گھر بلانے لگی۔ روبی کے اس مشکوک رویے اور گھبراہٹ کو دیکھ کر پولیس اور اس کے جیٹھ دونوں کو شک ہو گیا۔ جب پولیس نے روبی کو حراست میں لے کر سخت پوچھ گچھ کی، تو وہ ٹوٹ گئی اور اپنا گناہ قبول کرتے ہوئے باتھ روم کا راز اگل دیا۔
فرش توڑ کر نکالی گئی لاش:
پولیس نے فوراً کارروائی کرتے ہوئے باتھ روم کا پکا فرش توڑا اور سریندر کی مسخ شدہ لاش کو باہر نکال کر پوسٹ مارٹم کے لیے بھیج دیا۔ ہری پربت سرکل کی اے سی پی ‘امیشا’ نے ۔بتایا کہ ملزمہ روبی شرما کو گرفتار کر لیا گیا ہے اور اس سے مزید تفتیش جاری ہے کہ اس ہولناک قتل میں کوئی اور بھی شامل تھا