انٹر فرسٹ ایئر میں 98.6 فیصد نمبر لانے والے طالب علم نے خودکشی کر لی، گدوال سے افسوسناک واقعہ

حیدرآباد: تلنگانہ کے ضلع گدوال میں ایک افسوسناک واقعہ پیش آیا، جہاں ایک 17 سالہ انٹرمیڈیٹ طالب علم نے مبینہ طور پر اپنی خاتون لیکچرر کی جانب سے کلاس میں توہین کیے جانے کے بعد خودکشی کر لی۔ واقعے کے بعد علاقے میں غم و غصے کی لہر دوڑ گئی، جبکہ پولیس نے مقدمہ درج کر کے تحقیقات شروع کر دی ہیں۔

اطلاعات کے مطابق نتھی بوٹو ترون نامی طالب علم گدوال کے سرکاری جونیئر کالج میں انٹرمیڈیٹ سیکنڈ ایئر کا طالب علم تھا۔ اس نے انٹر فرسٹ ایئر کے امتحانات میں 440 میں سے 434 نمبر حاصل کیے تھے اور ضلع میں دوسرا مقام حاصل کیا تھا۔

ذرائع کے مطابق کلاس کے دوران ایک خاتون لیکچرر نے ترون کا موازنہ ایسے طالب علم سے کیا جس نے 435 نمبر حاصل کیے تھے۔ بتایا جاتا ہے کہ لیکچرر نے ترون سے کہا کہ تم نے اگر 434 نمبر حاصل کر لیے تو کیا بہت بڑے آدمی بن گئے ہو؟ تم سے زیادہ نمبر لینے والے بھی موجود ہیں۔

رپورٹس کے مطابق جب طالب علم نے مؤدبانہ انداز میں کہا کہ اس طرح سب کے سامنے شرمندہ کرنا مناسب نہیں، تو مبینہ طور پر لیکچرر مزید برہم ہو گئیں اور اسے ڈانٹنے کے ساتھ ایک تھپڑ بھی مارا۔ یہ بھی دعویٰ کیا جا رہا ہے کہ کلاس میں موجود دیگر طلبہ کے ہنسنے سے ترون شدید ذہنی دباؤ اور صدمے کا شکار ہو گیا۔

بتایا جاتا ہے کہ منگل کے روز گھر میں کوئی موجود نہ ہونے پر طالب علم نے ایک خودکشی نوٹ لکھا اور بعد ازاں پھندا لگا کر اپنی جان دے دی۔

رپورٹس کے مطابق خودکشی نوٹ میں ترون نے لکھا کہ اساتذہ کا فرض طلبہ کی حوصلہ افزائی کرنا ہے، نہ کہ انہیں سب کے سامنے ذلیل کرنا۔ اس نے یہ بھی تحریر کیا کہ ایک حساس طالب علم کے لیے ایسی بے عزتی ناقابلِ برداشت ہو سکتی ہے اور متعلقہ لیکچرر کے خلاف کارروائی کی جانی چاہیے تاکہ آئندہ کسی اور طالب علم کے ساتھ ایسا واقعہ پیش نہ آئے۔

پولیس نے واقعے کی اطلاع ملنے کے بعد لاش کو پوسٹ مارٹم کے لیے منتقل کر دیا ہے اور معاملے کی مختلف پہلوؤں سے تحقیقات جاری ہیں۔ حکام کا کہنا ہے کہ خودکشی نوٹ سمیت تمام شواہد کا جائزہ لیا جا رہا ہے اور تحقیقات مکمل ہونے کے بعد مناسب قانونی کارروائی کی جائے گی۔